【如果政治立場會影響工作機會，香港就真係玩完】
上星期有位求職者同我講，佢自己apply咗一份marketing工，已經上埋去second in，諗住一切順利啦，點知最後冇晒下文，佢懷疑係答錯嘢所致，因為去到interview尾聲，HR問咗佢一個問題:「其實呢度返工都好方便，又唔難搵，次次同求職者講係放催淚彈嗰度，啲人就識嚟，哈哈，你嗰陣有冇喺樓下靜坐呀?」
我：「咁你點答?」
求職者:「我照直話有囉，雖然放催淚彈嗰次不在場，但係我同埋朋友都有去過旺角、銅鑼灣同埋夏愨道佢公司附近靜坐，咁佢聽完後明顯變晒臉，同之前first in時個笑騎騎樣好大差別，臨尾佢話我走得喇，返去等消息，仲有大把人要in，直情feel到佢語氣有啲凶狠。」
咦，咪住先，件事好似唔知喺邊度聽過，係係係，我記得喇，大約兩年前一個HR同我講過，咁我問個求職者可唔可以開公司名啦，果然係同一間。
回帶去2015農曆新年，有間公司嘅HR搵我哋幫手請人，事關新年攞咗雙糧之後，例牌多人辭職，個HR要我哋搵嗰啲職位唔算難，而且佢哋係美國公司，規模唔細，office擺得喺夏愨道嗰堆商廈亦唔慌失禮，但佢臨尾加咗樣條款:「唔要黃絲。」
我:「你哋唔係美國公司咩? 有中資背景? 老闆落咗禁令唔請黃絲?」
HR:「唔係呀，係我自己唔鍾意啲黃絲，你知唔知我當時放工幾麻煩?成條夏愨道封晒，香港就係俾呢啲人搞亂。」
我:「咁你想我問埋啲求職者係咪黃絲?」
HR:「梗係啦，呢啲人咁鍾意搞對抗，第日請咗佢哋返嚟，容乜易做得唔開心就作反，你直接問佢哋喺雨傘運動期間有冇去過示威靜坐，再唔係add佢哋whatsapp同facebook，睇下有冇用黃絲帶做頭像。」
我:「sorry，咁真係未必做到。」
HR:「搞錯呀，你哋同行嗰間XXX公司都話做到啦。」
我:「唔係做唔做到嘅問題，係我哋面試求職者嗰陣，唔會問呢類題目，因為政治立場同工作能力係唔掛勾。」
HR:「咁算啦，我叫返XXX公司幫我搵。」然後啪一聲，個HR cut咗我線。
其實當時係幾嬲架，心諗一間公司想請人，竟然會因為一個HR佢自己唔鍾意黃絲，仲要係阻住佢放工咁小事，而將一班人拒諸門外，究竟佢老闆知唔知架?
我inbox每日收到最多嘅問題，就係問點樣答各種Interview question，個人認為答得聰明係應該嘅，但如果要完全扭曲事實、性格同本意，咁係咪應該諗下呢份工嘅人同埋文化，係咪真係適合自己呢? 一個星期返5日工 (有啲仲係5日半、6日)，都係做返自己舒服啲，勉強冇幸福。我太渺小喇，冇能力改變啲乜，小編唯一可以做嘅，就係唔幫佢哋搵人，我始終覺得個社會唔應該變成咁，當政治立場會影響你嘅工作機會，香港就係咁先喇。
Search